Канон молебен св. мученику Конону

Память 5(18) марта.

Встав перед образом, мирянин молится малый начал.

Боже, милостив буди мне грешному (поклон).

Создавыи мя, Господи, и помилуй мя (поклон).

Без числа согреших, Господи, помилуй и прости мя, грешнаго (поклон).

Достойно есть, яко воистину блажити Тя Богородице, присно блаженную и пренепорочную, и Матерь Бога нашего. Честнейшую херувим и славнейшую воистину серафим, без истления Бога Слова рождьшую, сущую Богородицу, Тя величаем (поклон всегда земной).

Слава Отцу и Сыну и Святому Духу (поклон).

И ныне и присно и во веки веком, аминь (поклон).

Господи помилуй, Господи помилуй, Господи благослови (поклон).

Господи, Исусе Христе, Сыне Божии, молитв ради Пречистыя Твоея Матере, силою Честнаго и Животворящаго Креста, и святаго Ангела моего хранителя, и всех ради святых, помилуй и спаси мя грешнаго, яко Благ и Человеколюбец. Аминь (поклон земной, без крестнаго знамения).

Эти молитвы называются «началом» или «приходными и исходными поклонами» потому, что они совершаются в начале и после всякого молитвенного правила.

После этого повтори молитву мытаря с поклонами:

Боже, милостив буди мне грешному (поклон).

Создавыи мя, Господи, и помилуй мя (поклон).

Без числа согреших, Господи, помилуй и прости мя грешнаго (поклон).

3а молитв святых отец наших, Господи Исусе Христе Сыне Божии, помилуй нас. Аминь.

Святыи Боже, Святыи Крепкии, Святыи Безсмертныи, помилуй нас (трижды, с поклонами). Слава Отцу и Сыну и Святому Духу, и ныне и присно и во веки веком, аминь. Пресвятая Троице, помилуй нас. Господи, очисти грехи наша. Владыко, прости беззакония наша. Святыи, посети и исцели немощи наша, имене Твоего ради. Господи помилуй (трижды). Слава Отцу и Сыну и Святому Духу, и ныне, и присно, и во веки веком, аминь. Отче наш, Иже еси на небесех, да святится имя Твое, да приидет царствие Твое, да будет воля Твоя, яко на небеси и на земли. Хлеб наш насущныи даждь нам днесь, и остави нам долги наша, яко же и мы оставляем должником нашим, и не введи нас во искушение, но избави нас от лукаваго.

Господи Исусе Христе, Сыне Божии, помилуй нас. Аминь.

Господи помилуй (12 раз).

Слава Отцу и Сыну, и Святому Духу, и ныне, и присно, и во веки веком, аминь.

Приидите, поклонимся Цареви нашему Богу (поклон).

Приидите, поклонимся Христу Цареви и Богу нашему (поклон).

Приидите, поклонимся и припадем к самому Господу Исусу Христу, Цареви и Богу нашему (поклон).

Псалом 142. Господи, услыши молитву мою, внуши моление мое во истине Твоей, услыши мя в правде Твоей. И не вниди в суд с рабом Твоим, яко не оправдится пред Тобою всяк живыи. Яко погна враг душу мою, и смирил есть в земли живот мой. Посадил мя есть в темных, яко мертвыя веку, и уны во мне дух мой, во мне смутися сердце мое. Помянух дни древния, поучихся во всех делех Твоих, и в делех руку Твоею поучахся. Воздех к Тебе руце мои, душа моя, яко земля безводная Тебе. Скоро услыши мя Господи, исчезе дух мой. Не отврати лица Твоего от мене, и уподоблюся низходящим в ров. Слышану сотвори мне заутра милость Твою, яко на Тя уповах. Скажи мне Господи, путь вонь же пойду, яко к Тебе взях душу мою. Изми мя от враг моих Господи, к Тебе прибегох. Научи мя творити волю Твою, яко Ты еси Бог мой. Дух Твой благии наставит мя на землю праву. Имене Твоего ради, Господи живиши мя, правдою Твоею изведеши от печали душу мою. И милостию Твоею потребиши враги моя, и погубиши вся стужающия души моей, яко аз раб Твой есмь.

Слава Отцу и Сыну, и Святому Духу, и ныне, и присно, и во веки веком, аминь. Аллилуия, Аллилуия, слава Тебе, Боже (трижды, с поклонами).

Господи помилуй (12 раз). Слава Отцу и Сыну, и Святому Духу, и ныне, и присно, и во веки веком, аминь.

Бог Господь и явися нам, благословен грядыи во имя Господне.

И по каждом стихе глаголем: Бог Господь и явися нам, благословен грядыи во имя Господне.

Стих 1. Исповедайтеся Господеви яко Благ, яко в век милость Его.

Стих 2. Обышедше обыдоша мя и именем Господним противляхся им.

Стих 3. Не умру, но жив буду и повем дела Господня.

Стих 4: Камень, Его же небрегоша зиждущии, Сей бысть во главу углу, от Господа бысть Сей, и есть дивна во очию нашею.

Тропарь, глас 3. Яко девственника предивна, и мученика непобедима, блаженнаго страдальца, на бесы власть преимшаго, Конона песньми восхвалим, и к нему возопием, моли Христа Бога, да спасет душя нашя. (два раза)

Слава Отцу и Сыну и Святому Духу, и ныне, и присно, и вовеки веком. аминь. Богородичен. Тебе Ходатайцу спасения рода нашего воспеваем, Богородице Дево, плотию бо Еюже из Тебе прошед Сын Твой и Бог наш. Крестную прием страсть, избавил есть нас из истления, яко Человеколюбец.

Псалом 50. Помилуй мя Боже, по велицей милости Твоей. И по множеству щедрот Твоих, очисти беззаконие мое. Наипаче омый мя от беззакония моего и от греха моего очисти мя. Яко беззаконие мое аз знаю, и грех мой предо мною есть выну. Тебе единому согреших, и лукавое пред Тобою сотворих. Яко да оправдишися в словесех Своих и победиши внегда судити. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очишуся, омыеши мя, и паче снега убелюся. Слуху моему даси радость и веселие, возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне Боже, и дух прав обнови во утробе моей. Не отверзи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычным утверди мя. Научу беззаконныя путем Твоим, и нечестивии к Тебе обратятся. Избави мя от кровий Боже, Боже спасения моего, возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел жертвы, дал бых убо, всесожжения не благоволиши. Жертва Богу, дух сокрушен, сердце сокрушено и смирено, Бог не уничижит. Ублажи, Господи, благоволением Твоим Сиона, и да созиждутся стены иеросалимския. Тогда благоволиши жертву правды, возношение и всесожигаемая. Тогда возложат на олтарь Твой тельца.

Господи Исусе Христе Сыне Божии, помилуй нас. Аминь.

Глас 6, песнь 1. Ирмос. Яко посуху ходив Израиль, по бездне стопами, гонителя фараона видя потопляема, Богу победную песнь поя вопияше.

Запев. Святыи мучениче Кононе, моли Бога о нас. (поклон)  Песнено словесы тя Божествеными Христова похвалити мученика, и твердаго подвижника, мое помышление светом, иже в тебе славныи мучениче озари.

Святыи мучениче Кононе, моли Бога о нас. Подобяся Божественым, ангельским блаженне безмолвием, якоже ангел на земли воистину пожит плотию, похоти обуздавая, и удобряяся.

Слава Отцу, и Сыну, и Святому Духу. Законы Божественыя соблюд, еллинскаго беззакония преподобне возгнушася яве. И многи привел еси к Богу ученьми, и священными уверив чюдесы.

И ныне и присно, и во веки веком. Аминь. (Богородичен) Украсшися добротою добродетелей, Краснаго родила еси паче всех земленых. Своими Всенепорочная нас красотами, мудре украсившаго.

Катавасия. Избави от бед рабы своя, святыи мучениче Кононе, яко вси по Бозе к тебе прибегаем, ты бо молиши за нас Христа Бога нашего. (поклон) Господи помилуй, Господи помилуй, Господи помилуй. (с поклонами)

Песнь, 3. Ирмос. Несть свята, якоже Ты Господи Боже мой, вознесыи рог верных си Блаже. И утверждь из на камени исповедания Ти.

Святыи мучениче Кононе, моли Бога о нас. Украсив Божествеными добродетельми преподобне душю свою, жилище сию Отца и Сына и Духа   воистину Святаго, мучениче соделал еси.

Святыи мучениче Кононе, моли Бога о нас. Иже древле в прелесть глубокую в падщии окаянне, в явленную высоту, высокими твоими учении возводятся издалеча, мучениче Кононе воспевающе тя.

Слава Отцу, и Сыну, и Святому Духу. Церкви быв Божия, звании Божественными низложил еси преблаженне, представ церкви истукана. Наставляя заблуждьшыя, к Божественному разумению.

И ныне и присно, и во веки веком. Аминь. (Богородичен) Един Святыи из Тебе раждается Пресвятая, паче ума же и слова. Освящая земленыя, скверным врага наветом страстем работающыя.

Катавасия. Избави от бед рабы своя, святыи мучениче Кононе, яко вси по Бозе к тебе прибегаем, ты бо молиши за нас Христа Бога нашего. (поклон) Господи помилуй, Господи помилуй, Господи помилуй. (с поклонами)

Седален, глас 8. Под. Премудрости. Бога всеми оружии одеявся, бесом явися всегубитель, и бысть жертва верным не отложна, всадника имея столп веры, к высоте взимаеши нас чюдес твоих. Отнюдуже и победы от Бога венца достойно приял еси, мучениче Кононе многострадальне. Сего ради вопием ти, моли Христа Бога, грехов оставление даровати, чтущим любовию святую память твою.

Слава Отцу и Сыну и Святому Духу, и ныне и присно и во веки веком. Аминь. (Богородичен)

В напасти многоплетенныя впад, от враг видимых и невидимых, волнением одержимь есмь, безмерных согрешении моих, яко к теплому заступлению, и покрову моему Пречистая, пристанищу притекаю Твоея Благости. Отнюду же Пречистая из Тебе воплощьшагося без семене, моли о всех рабех Твоих, иже непрестанно поющих Тя, Богородице Всечистая. Молящи Того прилежно, согрешением оставление даровати, поклоняющимся верою рожеству Твоему.

Песнь, 4. Ирмос. Христос мне сила Бог и Господь, честная церкви Боголепно зовет вопиющи, от совести чисты о Господе празднующих.

Святыи мучениче Кононе, моли Бога о нас. Храмы низложил еси безбожным святе. И боги погибели конечьней мучениче предал еси, чюдодействуя и совершаю досточюдная знамения.

Святыи мучениче Кононе, моли Бога о нас. Свято преподобне шествую Ти, бесовское колено, Божие слово покори тебе. И тя чюдес многих показаньми прославил есть.

Слава Отцу, и Сыну, и Святому Духу. Вельми любя тя преблагии, Михаила тебе великаго пестуна даде, научающа великии Кононе яве, превеликим тайнам.

И ныне и присно, и во веки веком. Аминь. (Богородичен) Святая Владычице, яже Пресвятое воплощьши Слове. Освящение души моей даруй, наставлящи ми ум безпутием поревающься.

Катавасия. Избави от бед рабы своя, святыи мучениче Кононе, яко вси по Бозе к тебе прибегаем, ты бо молиши за нас Христа Бога нашего. (поклон) Господи помилуй, Господи помилуй, Господи помилуй. (с поклонами)

Песнь, 5. Ирмос. Божиим светом Ти Блаже, утренюющих Ти душя любовию просвети молюся, Тя ведети Слово Божие Истиннаго Бога, от мрака греховнаго изимающя.

Святыи мучениче Кононе, моли Бога о нас. Каплями кровей твоих священных, обагрил еси себе мучения одежю, вельми окровавився, мучениче велемудрене. И живеши радуюся, в вышних жилищех и светлостех.

Святыи мучениче Кононе, моли Бога о нас. Простирает ты блаженне злочествыи, весь простер к Богу ум славне имуща. Ранами раздробляет, призывающа имя великое Вседержителя.

Слава Отцу, и Сыну, и Святому Духу. Благодатию вжилився, терпяще капли язвеныя, мученичеки украшаяся, и безбожие Кононе побеждая, и без смертию сподобляемь.

И ныне и присно, и во веки веком. Аминь. (Богородичен) Избавльшеся всякия прародительныя Пречистая клятвы Тобою, благословение улучихом. Темже благословим и величаем, и любовию тя чтем и ублажаем.

Катавасия. Избави от бед рабы своя, святыи мучениче Кононе, яко вси по Бозе к тебе прибегаем, ты бо молиши за нас Христа Бога нашего. (поклон) Господи помилуй, Господи помилуй, Господи помилуй. (с поклонами)

Песнь, 6. Ирмос. Житейскаго моря воздвизаема зря напастей бурею, в тихо пристанище притек вопию Ти, возведи от тли живот мой Многомилостиве.

Святыи мучениче Кононе, моли Бога о нас. Облистав яко солнце, светолучными добродетельми, и преславными чюдесы. Терпением же страдании, вельми украшаяся. Просвещаеши концы, великоименитыи мучениче хвалящыя тя.

Святыи мучениче Кононе, моли Бога о нас. Добротами страданей,  краснейши показався, чюдодействуеши предивная. И умер, паки по погребении прогоняя недуги, и отгоня прелестныя блаженне духи.

Слава Отцу, и Сыну, и Святому Духу. Страсти изврачуй душям нашим мудре, и плоти облегчи неможения. Изряден врачь нам чтущим тя, от Бога дан еси Кононе славне.

И ныне и присно, и во веки веком. Аминь. (Богородичен) Призре Господь на Тя, и Тобою узрети содела удальшыя Пречистая от Него. Темже якоже рекла еси, родове спасаемых ублажают Тя.

Катавасия. Избави от бед рабы своя, святыи мучениче Кононе, яко вси по Бозе к тебе прибегаем, ты бо молиши за нас Христа Бога нашего. (поклон) Господи помилуй, Господи помилуй, Господи помилуй. (с поклонами)

Господи помилуй. (трижды) Слава Отцу и Сыну и Святому Духу, и ныне и присно, и во веки веком. Аминь.

Кондак, глас 3. Чистотою яко ангел на земли пожив, от онуду же и собеседник ангелом быти сподобися. И родителя к Христову познанию привед. И Христа Единаго Бога исповеда, и страдав до крове мучениче Кононе, моли Христа Бога, непрестанно о всех нас.

Песнь, 7. Ирмос. Хладодательну убо пещь сотвори ангел, преподобным детем. Халдея же опали велением Божиим. Мучителя увеща вопити, благословен Бог отец наших.

Святыи мучениче Кононе, моли Бога о нас. Свет тебе незаходимыи восия, возненавидевшу страстей тму преподобне. Веселие же прият Тя, добрыи подвиг скончавша тщанием. Тем же поминай нас предстоя Христови.

Святыи мучениче Кононе, моли Бога о нас. Сердце твое кротко, и мудрование смирено явися преподобне. Имже погубил еси возношения вся врагу, возвышаемь Божественными добродетельми, и чюдесы старшными, Кононе мучеником степень.

Слава Отцу, и Сыну, и Святому Духу. Страшен всем бесом бысть. Сим повелевая повинутися, твоим священным Богомудре велением. Богу тя прославльшу, того делы добрыми на земли Кононе прославльшаго.

И ныне и присно, и во веки веком. Аминь. (Богородичен) Иже волею вся содевая , во Твою восхоте вселитися пренепорочную Богородице утробу, воистину един, иже во святых прославляемыи Бог, великии и страшныи.

Катавасия. Избави от бед рабы своя, святыи мучениче Кононе, яко вси по Бозе к тебе прибегаем, ты бо молиши за нас Христа Бога нашего. (поклон) Господи помилуй, Господи помилуй, Господи помилуй. (с поклонами)

Песнь, 8. Ирмос. Испламене святым росу источи, а праведнаго жертву жертву и воду попали. Вся бо твориши Христе елико хощеши. Тем Тя превозносим Господа вовеки.

Святыи мучениче Кононе, моли Бога о нас. Твердо сопротивился еси суемудреному, мнящу тебе повинути, чести чюждим принести страдальче от него мерзостем. Тем яко законно пострадав прославился еси.

Святыи мучениче Кононе, моли Бога о нас. Иже бесовскими уязвившеся налоги, учении Божественными твоими исцелеваятся. И скорбных избавление приемлют, воспевающе благодать твою Богомудре.

Слава Отцу, и Сыну, и Святому Духу. Недугом всяким здравие почерпите, иже к раце преподобнаго верою приступающе. Точит бо яве Духа благодатию, и истицанию страстем изсушает.

И ныне и присно, и во веки веком. Аминь. (Богородичен) Мольбу зиждителю принеси, душя нашя спасти Богорадованная, и страстей одержания нас избавити, и злодейственных человек искушения.

Катавасия. Избави от бед рабы своя, святыи мучениче Кононе, яко вси по Бозе к тебе прибегаем, ты бо молиши за нас Христа Бога нашего. (поклон) Господи помилуй, Господи помилуй, Господи помилуй. (с поклонами)

Песнь, 9. Ирмос. Бога человеком неудобь видети, нань же не смеют чини ангельстии зрети. Тобою бо пречистая явися нам Слово воплощенно. Егоже величающе, с небесными вои Тя величаем.

Святыи мучениче Кононе, моли Бога о нас. (поклон) Якоже корабль виден бысть преплавающь, мирскую не мокрено богомудре бурю, добрых наятия спасающь, к красным пристанищем, покоя и царьствия Божия светлости.

Святыи мучениче Кононе, моли Бога о нас. Крестом яко бронями одеявся, вражия всеблаженне обнажил еси полки. И ногама своима красныма поработил еси. Раб же Владыце ближнии быв, порабощенныя врагомь избавляя.

Слава Отцу, и Сыну, и Святому Духу. О нас иже любовию восхваляющих тя, память сотвори, Христови венценосец предстоя, с вышними и безмерными силами. Яко да молитвами твоими обрящем милость, и злолютных изменения Кононе прехвальне.

И ныне и присно, и во веки веком. Аминь. (Богородичен) Светом твоим мя Дево просвети, иже нощию присно уныния одержима, и к земли погорблена, и деюща весь грех, нрава развращением, яко да тобою спасаемь пою Тя многопетую.

Катавасия. Избави от бед рабы своя, святыи мучениче Кононе, яко вси по Бозе к тебе прибегаем, ты бо молиши за нас Христа Бога нашего. (поклон) Господи помилуй, Господи помилуй, Господи помилуй. (с поклонами)

Задостойник, глас 8. Владычице, приими молитву раб Своих и избави нас от всякия нужды и печали. Ты еси Богородице, Оружие наше и Стена, Ты еси Заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси Пренепорочную Матерь Христа Бога нашего, Юже осени Дух Пресвятыи. (поклон до земли).

Святыи Боже, Святыи Крепкии, Святыи Безсмертныи, помилуй нас (трижды, с поклонами). Слава Отцу и Сыну и Святому Духу, и ныне и присно и во веки веком, аминь.Пресвятая Троице, помилуй нас. Господи, очисти грехи наша. Владыко, прости беззакония наша. Святыи, посети и исцели немощи наша, имене Твоего ради. Господи помилуй (трижды). Слава Отцу и Сыну и Святому Духу, и ныне, и присно, и во веки веком, аминь.

Отче наш, Иже еси на небесех, да святится имя Твое, да приидет царствие Твое, да будет воля Твоя, яко на небеси и на земли. Хлеб наш насущныи даждь нам днесь, и остави нам долги наша, яко же и мы оставляем должником нашим, и не введи нас во искушение, но избави нас от лукаваго.

Господи Исусе Христе, Сыне Божии, помилуй нас.

Аминь. Тропарь, глас 3. Яко девственника предивна, и мученика непобедима, блаженнаго страдальца, на бесы власть преимшаго, Конона песньми восхвалим, и к нему возопием, моли Христа Бога, да спасет душя нашя.

Слава Отцу и Сыну и Святому Духу. Кондак, глас 3. Чистотою яко ангел на земли пожив, от онуду же и собеседник ангелом быти сподобися. И родителя к Христову познанию привед. И Христа Единаго Бога исповеда, и страдав до крове мучениче Кононе, моли Христа Бога, непрестанно о всех нас.

И ныне, и присно, и вовеки веком. Аминь. Богородичен. Тебе Ходатайцу спасения рода нашего воспеваем, Богородице Дево, плотию бо Еюже из Тебе прошед Сын Твой и Бог наш. Крестную прием страсть, избавил есть нас из истления, яко Человеколюбец.

Посем: Господи помилуй (40 раз, с тремя поклонами в начале). Слава Отцу и Сыну, и Святому Духу, и ныне, и присно, и во веки веком, аминь.

Честнейшую херувим и славнейшую воистину серафим, без истления Бога Слова рождьшую, сущую Богородицу Тя величаем (поклон).

Слава Отцу и Сыну и Святому Духу (поклон)

И ныне и присно и во веки веком, аминь (поклон).

Господи помилуй, Господи помилуй, Господи благослови (поклон).

Господи Исусе Христе Сыне Божии, молитв ради Пречистыя Ти Матере, и святаго мученика Конона градаря, и всех святых, помилуй и спаси нас яко благ и человеколюбец. Аминь.

Потом молись о здравии того человека, за которого просишь у Бога по три раза произнося с поклонами о здравии и о спасении:

 Милостиве Господи, спаси и помилуй раба Своего (поклон) (называй имя, за кого молишься). Избави его от всякия скорби, гнева и нужды (поклон). От всякия болезни душевныя и телесныя (поклон). И прости ему всякое согрешение, вольное и невольное (поклон). И душам нашим полезная сотвори (поклон).

А после всего нужно помолиться опять «начал».

Боже, милостив буди мне грешному (поклон).

Создавыи мя, Господи, и помилуй мя (поклон).

Без числа согреших, Господи, помилуй и прости мя, грешнаго (поклон).

Достойно есть, яко воистину блажити Тя Богородице, присно блаженную и пренепорочную, и Матерь Бога нашего. Честнейшую херувим и славнейшую воистину серафим, без истления Бога Слова рождьшую, сущую Богородицу, Тя величаем (поклон всегда земной).

Слава Отцу и Сыну и Святому Духу (поклон).

И ныне и присно и во веки веком, аминь (поклон).

Господи помилуй, Господи помилуй, Господи благослови (поклон).

Господи, Исусе Христе, Сыне Божии, молитв ради Пречистыя Твоея Матере, силою Честнаго и Животворящаго Креста, и святаго Ангела моего хранителя, и всех ради святых, помилуй и спаси мя грешнаго, яко Благ и Человеколюбец. Аминь (поклон земной, без крестнаго знамения).

Боже, милостив буди мне грешному (поклон).

Создавыи мя, Господи, и помилуй мя (поклон).

Без числа согреших, Господи, помилуй и прости мя грешнаго (поклон).