Этот канон молебен святому мученику Внифантию, который имеет от Бога благодать избавлять от виннаго запойства, составлен в помощь начинающим верующим и с предельным уровнем инструкций. Его нужно молиться перед образом или Распятием. В большинстве мест сохранена орфография церковнославянскаго языка. Молитвы выделены жирным шрифтом, а указания написаны бледным, их читать не надо. Где написано слово поклон, значит нужно осенить себя крестным знамением после молитвы и совершить поклон до пояса.
Встав перед образом, мирянин молится малый начал.
Боже, милостив буди мне грешному (поклон).
Создавыи мя, Господи, и помилуй мя (поклон).
Без числа согреших, Господи, помилуй и прости мя, грешнаго (поклон).
Достойно есть, яко воистину блажити Тя Богородице, присно блаженную и пренепорочную, и Матерь Бога нашего. Честнейшую херувим и славнейшую воистину серафим, без истления Бога Слова рождьшую, сущую Богородицу, Тя величаем (поклон всегда земной).
Слава Отцу и Сыну и Святому Духу (поклон).
И ныне и присно и во веки веком, аминь (поклон).
Господи помилуй, Господи помилуй, Господи благослови (поклон).
Господи, Исусе Христе, Сыне Божии, молитв ради Пречистыя Твоея Матере, силою Честнаго и Животворящаго Креста, и святаго Ангела моего хранителя, и всех ради святых, помилуй и спаси мя грешнаго, яко Благ и Человеколюбец. Аминь (поклон земной, без крестнаго знамения).
Эти молитвы называются «началом» или «приходными и исходными поклонами» потому, что они совершаются в начале и после всякого молитвенного правила.
После этого повтори молитву мытаря с поклонами:
Боже, милостив буди мне грешному (поклон).
Создавыи мя, Господи, и помилуй мя (поклон).
Без числа согреших, Господи, помилуй и прости мя грешнаго (поклон).
3а молитв святых отец наших, Господи Исусе Христе Сыне Божии, помилуй нас. Аминь.
Святыи Боже, Святыи Крепкии, Святыи Безсмертныи, помилуй нас (трижды, с поклонами).
Слава Отцу и Сыну и Святому Духу, и ныне и присно и во веки веком, аминь.
Пресвятая Троице, помилуй нас. Господи, очисти грехи наша. Владыко, прости беззакония наша. Святыи, посети и исцели немощи наша, имене Твоего ради. Господи помилуй (трижды). Слава Отцу и Сыну и Святому Духу, и ныне, и присно, и во веки веком, аминь.
Отче наш, Иже еси на небесех, да святится имя Твое, да приидет царствие Твое, да будет воля Твоя, яко на небеси и на земли. Хлеб наш насущныи даждь нам днесь, и остави нам долги наша, яко же и мы оставляем должником нашим, и не введи нас во искушение, но избави нас от лукаваго.
Господи Исусе Христе, Сыне Божии, помилуй нас. Аминь.
Господи помилуй (12 раз).
Слава Отцу и Сыну, и Святому Духу, и ныне, и присно, и во веки веком, аминь.
Приидите, поклонимся Цареви нашему Богу (поклон).
Приидите, поклонимся Христу Цареви и Богу нашему (поклон).
Приидите, поклонимся и припадем к самому Господу Исусу Христу, Цареви и Богу нашему (поклон).
Псалом 142.
Господи, услыши молитву мою, внуши моление мое во истине Твоей, услыши мя в правде Твоей. И не вниди в суд с рабом Твоим, яко не оправдится пред Тобою всяк живыи. Яко погна враг душу мою, и смирил есть в земли живот мой. Посадил мя есть в темных, яко мертвыя веку, и уны во мне дух мой, во мне смутися сердце мое. Помянух дни древния, поучихся во всех делех Твоих, и в делех руку Твоею поучахся. Воздех к Тебе руце мои, душа моя, яко земля безводная Тебе. Скоро услыши мя Господи, исчезе дух мой. Не отврати лица Твоего от мене, и уподоблюся низходящим в ров. Слышану сотвори мне заутра милость Твою, яко на Тя уповах. Скажи мне Господи, путь вонь же пойду, яко к Тебе взях душу мою. Изми мя от враг моих Господи, к Тебе прибегох. Научи мя творити волю Твою, яко Ты еси Бог мой. Дух Твой благии наставит мя на землю праву. Имене Твоего ради, Господи живиши мя, правдою Твоею изведеши от печали душу мою. И милостию Твоею потребиши враги моя, и погубиши вся стужающия души моей, яко аз раб Твой есмь.
Слава Отцу и Сыну, и Святому Духу, и ныне, и присно, и во веки веком, аминь.
Аллилуия, Аллилуия, слава Тебе, Боже (трижды, с поклонами).
Господи помилуй (12 раз). Слава Отцу и Сыну, и Святому Духу, и ныне, и присно, и во веки веком, аминь.
Бог Господь и явися нам, благословен грядыи во имя Господне.
И по каждом стихе глаголем: Бог Господь и явися нам (полностью).
Стих 1. Исповедайтеся Господеви яко Благ, яко в век милость Его.
Стих 2. Обышедше обыдоша мя и именем Господним противляхся им.
Стих 3. Не умру, но жив буду и повем дела Господня.
Стих 4: Камень, Его же небрегоша зиждущии, Сей бысть во главу углу, от Господа бысть Сей, и есть дивна во очию нашею.
Тропарь, глас 4.Мученик Твой Господи Внифантий,во страдании своем венец прият нетленныи от Тебе Бога нашего. Имея бо крепость Твою непобедимую, мучащих упраздни, и разруши бесом немощная шатания. Того молитвами Христе Боже спаси душа наша. (два раза)
Слава Отцу и Сыну и Святому Духу, и ныне, и присно, и вовеки веком. аминь. Богородичен. Иже от века утаенное, и ангелом несведомое таинство, тобою Богородице земным явися Бог в неразмесне снятии воплощаемь, и крест волею нас ради восприим, им же воскреси первозданнаго, и спасе от смерти душа наша.
Псалом 50.
Помилуй мя Боже, по велицей милости Твоей. И по множеству щедрот Твоих, очисти беззаконие мое. Наипаче омый мя от беззакония моего и от греха моего очисти мя. Яко беззаконие мое аз знаю, и грех мой предо мною есть выну. Тебе единому согреших, и лукавое пред Тобою сотворих. Яко да оправдишися в словесех Своих и победиши внегда судити. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очишуся, омыеши мя, и паче снега убелюся. Слуху моему даси радость и веселие, возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне Боже, и дух прав обнови во утробе моей. Не отверзи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычным утверди мя. Научу беззаконныя путем Твоим, и нечестивии к Тебе обратятся. Избави мя от кровий Боже, Боже спасения моего, возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел жертвы, дал бых убо, всесожжения не благоволиши. Жертва Богу, дух сокрушен, сердце сокрушено и смирено, Бог не уничижит. Ублажи, Господи, благоволением Твоим Сиона, и да созиждутся стены иеросалимския. Тогда благоволиши жертву правды, возношение и всесожигаемая. Тогда возложат на олтарь Твой тельца.
Господи Исусе Христе Сыне Божии, помилуй нас. Аминь.
Канон святому мученику Внифантию, глас 4. Песнь 1, ирмос. Тристаты крепки рождеися от Девы, безстрастия во глубине души тричастное потопи молюся. Да ти яко в тимпане во умерщвенне телеси победное пою воспевание.
Запев. Святыи мучениче Внифантие, моли Бога о нас (поклон).
Усердным помыслом, подвигом поревновав доблим страдальцем, пострадал еси крепко. И змия умертвил еси страдании своими живоносными, страдальче Внифантие, святым ангелом собеседниче.
Запев. Святыи мучениче Внифантие, моли Бога о нас.
Видев на земли вражию лесть излиянну люте, доблии страдальче, душю распалив желанием Божественным, вшел еси в судилище небоязненым треблаженне мудрованием.
Слава Отцу и Сыну и Святому Духу. Мудростию Божественною просвещаемь блаженне, не мудрыя враги объюродил еси. Христа возвещая, дебельством плоти уподобльшася, им же явитися восхоте, Внифантие мучениче многострадальне.
И ныне, и присно, и во веки веком. Аминь.(Богородичен)
Гору Божию юде провиде Даниил, сень мысленную, Марию чистую, славы священие, трапезу, Божественныи хлеб вмещьшую, вси вернии единомудрено воспоем.
Катавасия. Избави от бед рабы своя, святыи мучениче Внифантие, яко вси по Бозе к тебе прибегаем, ты бо молиши за нас Христа Бога нашего. (поклон) Господи помилуй, Господи помилуй, Господи помилуй. ( с поклонами)
Песнь 3, ирмос. Яко неплоды роди, иже от язык церкви. И многое в чадех изнеможе, соньмище. Чюдному Богу нашему поем, свят еси Господи.
Запев. Святыи мучениче Внифантие, моли Бога о нас.
Якоже возжеле славне, свободу вышнюю от госпожи работы избавляешися. Страстем честным поревновав славне, иже за милосердие раба бывшаго.
Запев. Святыи мучениче Внифантие, моли Бога о нас.
Плотских вышьши явлься мудровании, изменением Божественных внезапу, всяких прилог лютых претерпел еси радуяся, мучениче Внифантие.
Слава Отцу и Сыну и Святому Духу.
Себе отвергл еси, и к подвигом и борением врага изшел еси, креста оружием укреплься. И победник быв прославися, мучениче Внифантие.
И ныне, и присно, и во веки веком. Аминь. (Богородичен) Себе излия отеческих неистощив во утробе твоей недр присносущии Бог, и твой сын бысть непорочная, спасает человечество.
Катавасия. Избави от бед рабы своя, святыи мучениче Внифантие, яко вси по Бозе к тебе прибегаем, ты бо молиши за нас Христа Бога нашего. (поклон) Господи помилуй, Господи помилуй, Господи помилуй. ( с поклонами)
Седален, глас 4. К сословию послан быв мученическому, мученик быв истинен. Пострадав по Христе крепко прехвальне. Бремя же блаженне отдан бысть верою пославшей тя, Внифантие блаженне. Но прилежно моли, прияти всем согрешением совершенное оставление.
Слава Отцу и Сыну и Святому Духу, и ныне и присно и во веки веком. Аминь.
Богородичен. Грехолюбив сыи молю тя, безгрешнаго Бога рождьшая, иже грехи вземлющаго миру чистая, многогрешную ущедрити душю мою, и грехи многими очистити. Грешником бо сама еси очищение, и спасение верным и заступление.
Песнь 4, ирмос. Любве ради щедре своего образа, на Кресте cвоем стал еси, и растаящася языцы. Ты бо еси человеколюбче крепость моя и пение.
Запев. Святыи мучениче Внифантие, моли Бога о нас.
Ублажая страждущих терпение, подобию мучениче честных страдании. Сим уподобился еси Богомудре пребогате.
Запев. Святыи мучениче Внифантие, моли Бога о нас.
Идыи верою к мученик Божественному сословию блаженне, себе самого желающей бремя досточюдне Богомудре отдал еси.
Слава Отцу и Сыну и Святому Духу.
Очищен яко злато мучениче, язвенным горнилом, чистейши явися нося зиждителя, страстем изображение.
И ныне, и присно, и во веки веком. Аминь.(Богородичен)
Девьством по рожестве запечатленну смотряюще отроковице, несказанно роженнаго слова из боку твоею, верно величаем.
Катавасия. Избави от бед рабы своя, святыи мучениче Внифантие, яко вси по Бозе к тебе прибегаем, ты бо молиши за нас Христа Бога нашего. (поклон) Господи помилуй, Господи помилуй, Господи помилуй. ( с поклонами)
Песнь, 5, ирмос.
Просвещение Твое Господи низпосли нам, и мглы нас прегрешении разреши Благии, твой мир с небесе даруя.
Запев. Святыи мучениче Внифантие, моли Бога о нас.
Яко светозарная восиял еси звезда от запад, и зашел еси мучениче страдания терпением, абие к западом восиеши озаряя концы.
Запев. Святыи мучениче Внифантие, моли Бога о нас.
Мученически подвизася, ногтем истерзание. Острыми мучениче тростми сбодаемь, и лукаваго жала притупил еси благодатию.
Слава Отцу и Сыну и Святому Духу.
Вражия изнемогоша богомудре о тебе коварьствия, ибо еже к Богу воззрением неуклонным плотьския раны якоже безплотен терпяаше.
И ныне, и присно, и во веки веком. Аминь.(Богородичен)
Скверны всякия отмый дево души моея, вопию ти. И спаси мя чистая, яже истиннаго Бога Спаса на земли воплощшая.
Катавасия. Избави от бед рабы своя, святыи мучениче Внифантие, яко вси по Бозе к тебе прибегаем, ты бо молиши за нас Христа Бога нашего. (поклон) Господи помилуй, Господи помилуй, Господи помилуй. ( с поклонами)
Песнь, 6,ирмос. Возопил, прообразуя погребение тридневное, пророк Иона в ките, Богу моляся, от тля спаси мя Исусе Царю сыи силам.
Запев. Святыи мучениче Внифантие, моли Бога о нас.
Биемь ранами плотскими, уязвил еси безбожныя, несцельно болящыя неведением. И болящим явися врач, страдальче Внифантие.
Запев. Святыи мучениче Внифантие, моли Бога о нас.
Возвышаемь к Богу блаженне пожданием подвиг, враги невидимыя разразил еси. И низверженым помощник страстотерпче был еси.
Слава Отцу и Сыну и Святому Духу.
Влачимь по земли якоже камень многоценен страдальче, прелести низложил еси утвержение. Верных же сердца умножая, верою утвердил еси.
И ныне, и присно, и во веки веком. Аминь. (Богородичен)
Купина тя проображааше, всенепорочная первие, горящи и никакоже опаляема, пречистая. Ибо якоже она неопалися, Бога воплощьши.
Катавасия. Избави от бед рабы своя, святыи мучениче Внифантие, яко вси по Бозе к тебе прибегаем, ты бо молиши за нас Христа Бога нашего. (поклон) Господи помилуй, Господи помилуй, Господи помилуй. ( с поклонами).
Слава Отцу и Сыну и Святому Духу, и ныне, и присно, и во веки веком, аминь.
Кондак, глас 2. Звезда светлая явися, не прелестная мирови, солнца Христа возвещающи, зарями твоими страстотерпче, Внифантие, и прелесть погаси всю. Нам же подаеши свет, моляся непрестанно о всех нас.
Икос. Пение ми даруй Боже мой, воспевати и глаголати, и почитати подвиги стастотерпьца Твоего и мученика, яко да благосочетанное восхвалю добляго во страдании, Внифантие, победителя в страстех бывша всегда, великаго, во благочестии, и в лице мученик восиявшаго. В них же поет непрестанно Христа, со множеством ангельским премудрыи, приемля свыше Божественное осияние, и моля непрестанно о всех нас.
Песнь, 7, ирмос.
В пещи Авраамския дети, Перстей, любовию паче, нежели пламенем поаляем, вопияху, благословен Бог отец наших.
Запев. Святыи мучениче Внифантие, моли Бога о нас.
Колене не преклонив истуканным, во искушения ввержен бысть, в велику по истине мучениче пещь. В ней же орошаемь благодаря Христа во веки.
Запев. Святыи мучениче Внифантие, моли Бога о нас.
Разорити крепость твоего исповедания тщася суемудренныи, во внутренняя твоя клокочющее олово не милостивно вливает, но яве посрамися.
Слава Отцу и Сыну и Святому Духу.
Посечен быв усердно в честную свою главу, врага льстиваго многокозненную отсекл еси, своего мужества мечем, мучениниче Христов богомудре.
И ныне, и присно, и во веки веком. Аминь.(Богородичен)
Да гласы преподобными песнословлю тя Отроковице, страстей мя избави мольбами своими, бед же и скорбей, и лукавых человек, озлобити мя ищущих.
Катавасия. Избави от бед рабы своя, святыи мучениче Внифантие, яко вси по Бозе к тебе прибегаем, ты бо молиши за нас Христа Бога нашего. (поклон) Господи помилуй, Господи помилуй, Господи помилуй. ( с поклонами)
Песнь, 8 , ирмос.
Избавителю всех Всесильне, посреде пламене веровашыя, сшед прохладил еси, и научи пети, вся дела Господня Господа.
Запев. Святыи мучениче Внифантие, моли Бога о нас.
Полезное твое соделовая спасение Христос Внифантие, взыскающа мощей добропобедных мученик, тя укрепляет, еже верно искаше быти.
Запев. Святыи мучениче Внифантие, моли Бога о нас.
Блаженной госпожи, блаженно сокровище подадеся блаженне имже обогатившися пояаше веселым сердцем, Господа пойте вся дела, и превозносите Его во веки.
Запев. Святыи мучениче Внифантие, моли Бога о нас.
Со тщанием славная жена воздвигши храм священен, тя в нем полагает. Сущии Божественней Троице храм, страстотерпче Христов Внифантие.
Слава Отцу и Сыну и Святому Духу.
Умертвився за любовь Зиждителя, умервяющаго страсти тлетворныя. Животворяи молитвою твоею, ясно вопиющыя, вся дела благословите пойте Господа.
И ныне, и присно, и во веки веком. Аминь.(Богородичен)
На тя Чистую Пребожественныи сошед, якоже весть воплотися. И земленыя обожи, поющыя Дево, благословите вся дела Господня Господа.
Катавасия. Избави от бед рабы своя, святыи мучениче Внифантие, яко вси по Бозе к тебе прибегаем, ты бо молиши за нас Христа Бога нашего. (поклон) Господи помилуй, Господи помилуй, Господи помилуй. ( с поклонами)
Песнь 9, ирмос.
Евва убо недугом ослушания, клятву себе приобрела есть. Ты же Дево Богородице, прозябением прижития Твоего, мирови благословение процвела еси. Темже Тя достойно величаем.
Запев. Святыи мучениче Внифантие, моли Бога о нас (поклон).
Видевше тя бремя священно, радовашеся. Вопиющи присно помнимая, раба послах тя блаженне, господина истинна подъемлю, работы мя зол избавляюща, Твоими Богоприятными мольбами.
Запев. Святыи мучениче Внифантие, моли Бога о нас.
Яко крин во удолиях мысленных, процвел еси мученически Внифантие. Яко финик возвысися, яко кедр познася мироуханен. Явися якоже избранен кипарис, благоухая душа наша.
Запев. Святыи мучениче Внифантие, моли Бога о нас.
Днесь память твоя нам восия страстотерпче, якоже солнце сиянием Божественных даровании, просвещеюща душа поющих тя. Страстей же мглу отгоняющи, мучениче Богомудре преблаженне.
Слава Отцу и Сыну и Святому Духу.
Яко солнце от запад восиял еси и восточнаго града достигл еси, идеже пострада. И смертию зашед, к жизни восиял еси. И Рима светлаго постигнул еси, сего ограждая мольбами своими.
И ныне, и присно, и во веки веком. Аминь.(Богородичен)
Светом мя озари Твоим Всенепорочная, иже во тме содержимаго греховней Богородице, и подаждь во дне ходити Божественных повелении, Богоневесто. Яко да пою Тя Всепетую.
Катавасия. Избави от бед рабы своя, святыи мучениче Внифантие, яко вси по Бозе к тебе прибегаем, ты бо молиши за нас Христа Бога нашего. (поклон) Господи помилуй, Господи помилуй, Господи помилуй. ( с поклонами)
Задостойник, глас 8. Владычице, приими молитву раб Своих и избави нас от всякия нужды и печали. Ты еси Богородице, Оружие наше и Стена, Ты еси Заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси Пренепорочную Матерь Христа Бога нашего, Юже осени Дух Пресвятыи (поклон до земли).
Святыи Боже, Святыи Крепкии, Святыи Безсмертныи, помилуй нас (трижды, с поклонами).
Слава Отцу и Сыну и Святому Духу, и ныне и присно и во веки веком, аминь.
Пресвятая Троице, помилуй нас. Господи, очисти грехи наша. Владыко, прости беззакония наша. Святыи, посети и исцели немощи наша, имене Твоего ради. Господи помилуй (трижды). Слава Отцу и Сыну и Святому Духу, и ныне, и присно, и во веки веком, аминь.
Отче наш, Иже еси на небесех, да святится имя Твое, да приидет царствие Твое, да будет воля Твоя, яко на небеси и на земли. Хлеб наш насущныи даждь нам днесь, и остави нам долги наша, яко же и мы оставляем должником нашим, и не введи нас во искушение, но избави нас от лукаваго.
Господи Исусе Христе, Сыне Божии, помилуй нас.
Аминь. Тропарь, глас 4.Мученик Твой Господи Внифантий,во страдании своем венец прият нетленныи от Тебе Бога нашего. Имея бо крепость Твою непобедимую, мучащих упраздни, и разруши бесом немощная шатания. Того молитвами Христе Боже спаси душа наша.
Слава Отцу и Сыну и Святому Духу.
Кондак, глас 2. Звезда светлая явися, не прелестная мирови, солнца Христа возвещающи, зарями твоими страстотерпче, Внифантие, и прелесть погаси всю. Нам же подаеши свет, моляся непрестанно о всех нас.
И ныне, и присно, и вовеки веком . аминь. Богородичен. Иже от века утаенное, и ангелом несведомое таинство, тобою Богородице земным явися Бог в неразмесне снятии воплощаемь, и крест волею нас ради восприим, им же воскреси первозданнаго, и спасе от смерти душа наша.
Посем: Господи помилуй (40 раз, с тремя поклонами в начале). Слава Отцу и Сыну, и Святому Духу, и ныне, и присно, и во веки веком, аминь.
Честнейшую херувим и славнейшую воистину серафим, без истления Бога Слова рождьшую, сущую Богородицу Тя величаем (поклон).
Слава Отцу и Сыну и Святому Духу (поклон)
И ныне и присно и во веки веком, аминь (поклон).
Господи помилуй, Господи помилуй, Господи благослови (поклон).
Господи Исусе ХристеСыне Божии, молитв ради Пречистыя Ти Матере, и святаго мученика Внифантия, и всех святых, помилуй и спаси нас яко благ и человеколюбец. Аминь.
Потом молись о здравии того человека, за которого просишь у Бога по три раза произнося с поклонами о здравии и о спасении:
Милостиве Господи, спаси и помилуй раба Своего (поклон) (называй имя, за кого молишься). Избави его от всякия скорби, гнева и нужды (поклон). От всякия болезни душевныя и телесныя (поклон). И прости ему всякое согрешение, вольное и невольное (поклон). И душам нашим полезная сотвори (поклон).
А после всего нужно помолиться опять «начал».
Боже, милостив буди мне грешному (поклон).
Создавыи мя, Господи, и помилуй мя (поклон).
Без числа согреших, Господи, помилуй и прости мя, грешнаго (поклон).
Достойно есть, яко воистину блажити Тя Богородице, присно блаженную и пренепорочную, и Матерь Бога нашего. Честнейшую херувим и славнейшую воистину серафим, без истления Бога Слова рождьшую, сущую Богородицу, Тя величаем (поклон всегда земной).
Слава Отцу и Сыну и Святому Духу (поклон).
И ныне и присно и во веки веком, аминь (поклон).
Господи помилуй, Господи помилуй, Господи благослови (поклон).
Господи, Исусе Христе, Сыне Божии, молитв ради Пречистыя Твоея Матере, силою Честнаго и Животворящаго Креста, и святаго Ангела моего хранителя, и всех ради святых, помилуй и спаси мя грешнаго, яко Благ и Человеколюбец. Аминь (поклон земной, без крестнаго знамения).
Боже, милостив буди мне грешному (поклон).
Создавыи мя, Господи, и помилуй мя (поклон).
Без числа согреших, Господи, помилуй и прости мя грешнаго (поклон).