Этот канон молебен святому апостолу и евангелисту Иоанну Богослову составлен в помощь начинающим верующим и с предельным уровнем инструкций. Его нужно молиться перед образом или Распятием.
Встав перед образом, мирянин молится малый начал.
Боже, милостив буди мне грешному (поклон).
Создавыи мя, Господи, и помилуй мя (поклон).
Без числа согреших, Господи, помилуй и прости мя, грешнаго (поклон).
Достойно есть, яко воистину блажити Тя Богородице, присно блаженную и пренепорочную, и Матерь Бога нашего. Честнейшую херувим и славнейшую воистину серафим, без истления Бога Слова рождьшую, сущую Богородицу, Тя величаем (поклон всегда земной).
Слава Отцу и Сыну и Святому Духу (поклон).
И ныне и присно и во веки веком, аминь (поклон).
Господи помилуй, Господи помилуй, Господи благослови (поклон).
Господи, Исусе Христе, Сыне Божии, молитв ради Пречистыя Твоея Матере, силою Честнаго и Животворящаго Креста, и святаго Ангела моего хранителя, и всех ради святых, помилуй и спаси мя грешнаго, яко Благ и Человеколюбец. Аминь (поклон земной, без крестнаго знамения).
Эти молитвы называются «началом» или «приходными и исходными поклонами» потому, что они совершаются в начале и после всякого молитвенного правила.
После этого повтори молитву мытаря с поклонами:
Боже, милостив буди мне грешному (поклон).
Создавыи мя, Господи, и помилуй мя (поклон).
Без числа согреших, Господи, помилуй и прости мя грешнаго (поклон).
3а молитв святых отец наших, Господи Исусе Христе Сыне Божии, помилуй нас. Аминь.
Святыи Боже, Святыи Крепкии, Святыи Безсмертныи, помилуй нас (трижды, с поклонами).
Слава Отцу и Сыну и Святому Духу, и ныне и присно и во веки веком, аминь.
Пресвятая Троице, помилуй нас. Господи, очисти грехи наша. Владыко, прости беззакония наша. Святыи, посети и исцели немощи наша, имене Твоего ради. Господи помилуй (трижды). Слава Отцу и Сыну и Святому Духу, и ныне, и присно, и во веки веком, аминь.
Отче наш, Иже еси на небесех, да святится имя Твое, да приидет царствие Твое, да будет воля Твоя, яко на небеси и на земли. Хлеб наш насущныи даждь нам днесь, и остави нам долги наша, яко же и мы оставляем должником нашим, и не введи нас во искушение, но избави нас от лукаваго.
Господи Исусе Христе, Сыне Божии, помилуй нас. Аминь.
Господи помилуй (12 раз).
Слава Отцу и Сыну, и Святому Духу, и ныне, и присно, и во веки веком, аминь.
Приидите, поклонимся Цареви нашему Богу (поклон).
Приидите, поклонимся Христу Цареви и Богу нашему (поклон).
Приидите, поклонимся и припадем к самому Господу Исусу Христу, Цареви и Богу нашему (поклон).
Псалом 142.
Господи, услыши молитву мою, внуши моление мое во истине Твоей, услыши мя в правде Твоей. И не вниди в суд с рабом Твоим, яко не оправдится пред Тобою всяк живыи. Яко погна враг душу мою, и смирил есть в земли живот мой. Посадил мя есть в темных, яко мертвыя веку, и уны во мне дух мой, во мне смутися сердце мое. Помянух дни древния, поучихся во всех делех Твоих, и в делех руку Твоею поучахся. Воздех к Тебе руце мои, душа моя, яко земля безводная Тебе. Скоро услыши мя Господи, исчезе дух мой. Не отврати лица Твоего от мене, и уподоблюся низходящим в ров. Слышану сотвори мне заутра милость Твою, яко на Тя уповах. Скажи мне Господи, путь вонь же пойду, яко к Тебе взях душу мою. Изми мя от враг моих Господи, к Тебе прибегох. Научи мя творити волю Твою, яко Ты еси Бог мой. Дух Твой благии наставит мя на землю праву. Имене Твоего ради, Господи живиши мя, правдою Твоею изведеши от печали душу мою. И милостию Твоею потребиши враги моя, и погубиши вся стужающия души моей, яко аз раб Твой есмь.
Слава Отцу и Сыну, и Святому Духу, и ныне, и присно, и во веки веком, аминь.
Аллилуия, Аллилуия, слава Тебе, Боже (трижды, с поклонами).
Господи помилуй (12 раз). Слава Отцу и Сыну, и Святому Духу, и ныне, и присно, и во веки веком, аминь.
Бог Господь и явися нам, благословен грядыи во имя Господне.
И по каждом стихе глаголем: Бог Господь и явися нам (полностью).
Стих 1. Исповедайтеся Господеви яко Благ, яко в век милость Его.
Стих 2. Обышедше обыдоша мя и именем Господним противляхся им.
Стих 3. Не умру, но жив буду и повем дела Господня.
Стих 4: Камень, Его же небрегоша зиждущии, Сей бысть во главу углу, от Господа бысть Сей, и есть дивна во очию нашею.
Тропарь, глас 2. Апостоле Христу Богу возлюбленне, потщися избавити люди безответны. Приемлет бо тя припадающа, иже приемлет тя на перси возлегша. Его же моли Богослове, на лежащее прещение языческое яко облак разгнати, прося нам мира и велия милости (дважды).
Слава Отцу и Сыну и Святому Духу, и ныне и присно и вовеки веком, аминь. (Богородичен)
Вся паче смысла вся преславная Твоя Богородице, таинства, чистотою запечатлена, и девством хранима; Мати разумеся неложна, Бога рождьши Истиннаго Того моли спастися душам нашим.
Псалом 50.
Помилуй мя Боже, по велицей милости Твоей. И по множеству щедрот Твоих, очисти беззаконие мое. Наипаче омый мя от беззакония моего и от греха моего очисти мя. Яко беззаконие мое аз знаю, и грех мой предо мною есть выну. Тебе единому согреших, и лукавое пред Тобою сотворих. Яко да оправдишися в словесех Своих и победиши внегда судити. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очишуся, омыеши мя, и паче снега убелюся. Слуху моему даси радость и веселие, возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне Боже, и дух прав обнови во утробе моей. Не отверзи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычным утверди мя. Научу беззаконныя путем Твоим, и нечестивии к Тебе обратятся. Избави мя от кровий Боже, Боже спасения моего, возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел жертвы, дал бых убо, всесожжения не благоволиши. Жертва Богу, дух сокрушен, сердце сокрушено и смирено, Бог не уничижит. Ублажи, Господи, благоволением Твоим Сиона, и да созиждутся стены иеросалимския. Тогда благоволиши жертву правды, возношение и всесожигаемая. Тогда возложат на олтарь Твой тельца.
Господи Исусе Христе Сыне Божии, помилуй нас. Аминь.
Канон святому славному и всехвальному апостолу и евангелисту Иоанну Богослову.
глас 2 песнь 1. Ирмос. Во глубине потопи древле, фараонитская вся воинства, преоружена сила. Воплощьжееся Слово преспеющия грехи потребило есть, преславныи Господь, яко прославися.
Запев. Святыи славныи и всехвальныи апостоле и евангелисте Иоанне Богослове моли Бога о нас(поклон).
Царство небесное блаженне, еже проповедал еси приим, и Словеси собеседник быв небесному. Верующыя честному ти проповеданию, и Богословию, твоими молитвами сохрани.
Запев. Святыи славныи и всехвальныи апостоле и евангелисте Иоанне Богослове моли Бога о нас.
Крепок смысл являя, о всех небрегл еси земных. И соуз естества и Словеси премудре умножа, словесно приближися. И от безсловесия ускотившыяся свободил еси.
Слава Отцу и Сыну и Святому Духу.
Небесных разум приим Богословесно блаженнее, Бога Слова проповедал еси: Искони бе Слово, Слово бе к Своему Родителю. И Бог бе Слово, благовествуя научил еси.
И ныне и присно и вовеки веком, аминь.(Богородичен)
Отроковиц Божественных ли, Божественно в женах тя добрую воспевают, Богородице Владычице добротами украшену Божества, добротворительное бо Слово, паче Слова родила еси.
Катавасия. Избави от бед рабы своя, святыи славныи апостоле и евангелисте Иоанне Богослове, яко вси по Бозе к тебе прибегаем, ты бо молиши за нас Христа Бога нашего. (поклон). Господи помилуй(поклон), Господи помилуй(поклон), Господи помилуй(поклон).
Песнь 3. Ирмос. Процвела есть пустыня яко крин Господи, язычная неплодящая церкви пришествием Ти, о ней же утвердися мое сердце.
Запев. Святыи славныи и всехвальныи апостоле и евангелисте Иоанне Богослове моли Бога о нас.
Тройческую явил еси Богословным языком си, юже паче ума тайну Иоанне, Богоблаженне, о нейже утвердися мое сердце.
Запев. Святыи славныи и всехвальныи апостоле и евангелисте Иоанне Богослове моли Бога о нас.
Язык твой бысть книжника трость. Пресвятаго Духа. Богописанно знаменающе, честное твое и Божественное Евангелие.
Слава Отцу и Сыну и Святому Духу.
Премудрости ты бездну, почерпе премудре, возлег со дерзновением на премудрости Источник, и сему Богопроповедник был еси.
И ныне и присно и вовеки веком, аминь.(Богородичен)
Едину Богородицу тя и Матерь чтем, яко спасения ходатаицу бывшу нам Пренепорочная, и мир избавльшую молитвами си.
Катавасия. Избави от бед рабы своя, святыи славныи апостоле и евангелисте Иоанне Богослове, яко вси по Бозе к тебе прибегаем, ты бо молиши за нас Христа Бога нашего (поклон). Господи помилуй(поклон), Господи помилуй(поклон), Господи помилуй(поклон).
Седален. Глас 8, подобен. Премудрости на перси возлег, и разум сущих навык, Божественно возгремел еси икони бе Слово. Добре написав первие Словеси воплощение, и проповедал един безначальное рожество. Темже и языком уловляя языки, проповедаеши концем , и просвещаеши чюдесы, Богослове апостоле. Моли Христа Бога, грехом оставление даровати, празднующим любовию святую память твою.
Слава Отцу и Сыну и Святому Духу, и ныне и присно и во веки веком, аминь. (Богородичен)
В напасти многоплетенныя впад. от враг видимых и невидимых, бурею одержимь бесчисленных согрешений моих. И яко к теплому заступлению и покрову твоему Чистая, ко пристанищу притекаю твоея благости. Тем же Пресвятая, иже из тебе воплощенному без семене, молися прилежно о всех рабех своих, непрестанно молящихтися Богородице Пречистая. Молящи Его присно, согрешением оставление даровати, воспевающим достойно славу твою.
Песнь 4. Ирмос. Пришествовав от Девы, не ходатай ни ангел, но Ты сам Господи воплощься и спасе всего мя человека. Тем вопию Ти, слава силе Твоей.
Запев. Святыи славныи и всехвальныи апостоле и евангелисте Иоанне Богослове моли Бога о нас.
Слово тя Богослова достойно показа Того Божеству тайно научив преизящно. И еже по человеку, смотрению наказав неизреченному.
Запев. Святыи славныи и всехвальныи апостоле и евангелисте Иоанне Богослове моли Бога о нас.
Ум Божествен, и девственно тело стяжав. Церковь был еси, жива же и одушевленна славне, и жилище препетыя Троицы освященное.
Слава Отцу и Сыну и Святому Духу.
Сыновством Пречистыя Девы почтеся, девственниче блаженне, и брат показася избравшему тя, и ученика Богослова совершившему.
И ныне и присно и вовеки веком, аминь.(Богородичен)
Исцеляя Еввино древнее преступление, в тя Пренепорочную и Пречистую вселися Пребожественный, всего мя человека вообразити падша.
Катавасия. Избави от бед рабы своя, святыи славныи апостоле и евангелисте Иоанне Богослове, яко вси по Бозе к тебе прибегаем, ты бо молиши за нас Христа Бога нашего. (поклон). Господи помилуй(поклон), Господи помилуй(поклон), Господи помилуй(поклон).
Песнь 5. Ирмос. Ходатай Богу и человеком бысть Христе Боже. Тобою бо Владыко к Светоначальнику Отцу Твоему, от нощи неведения преведение обретохом.
Запев. Святыи славныи и всехвальныи апостоле и евангелисте Иоанне Богослове моли Бога о нас.
Небесен ум Богослове бысть благодатию. Весь свет быв, еже к первоначальному свету приближением, и чистым ти зрением, еже к нему обожением.
Запев. Святыи славныи и всехвальныи апостоле и евангелисте Иоанне Богослове моли Бога о нас.
Умом чистым, и святыми устами Богодухновенне, и пречистыми усты свое благовествование проповедал еси, общее спасение всем верным предложил еси.
Слава Отцу и Сыну и Святому Духу.
Со Христом живыи от младенства, сосуд благодати от Него сотворен бысть богословие держа, и Троичестей славе паче естества научая.
И ныне и присно и вовеки веком, аминь. (Богородичен)
Глаголы твоя поминающее, тя ныне блажим. Тобою всенепорочная, блаженство неизреченное, и жизнь несостареемую воистину прияхом.
Катавасия. Избави от бед рабы своя, святыи славныи апостоле и евангелисте Иоанне Богослове, яко вси по Бозе к тебе прибегаем, ты бо молиши за нас Христа Бога нашего. (поклон). Господи помилуй(поклон), Господи помилуй(поклон), Господи помилуй(поклон).
Песнь 6. Ирмос. В бездне греховней одержимь, неизследную милосердия Твоего призываю бездну, от тли Боже мя возведи.
Запев. Святыи славныи и всехвальныи апостоле и евангелисте Иоанне Богослове моли Бога о нас.
Исус Бог мой и Господь, твою чистоту приим, и совершенное очищение, и брата Богослова приятова.
Запев. Святыи славныи и всехвальныи апостоле и евангелисте Иоанне Богослове моли Бога о нас.
Венчав святынею житие свое. Сице надеяся, Премудрости возлегл еси на перси славнее, и благодать от Туду извлече.
Слава Отцу и Сыну и Святому Духу.
Великая и Божественная сияния Богословия твоего, вся просветиша славне вселенную, и Светом трисолнечным озариша
И ныне и присно и вовеки веком, аминь. (Богородичен)
Небо прострый волею, Небо земленое другое распростре тя, Богомати чистая, и ис тебе восияв явися.
Катавасия. Избави от бед рабы своя, святыи славныи апостоле и евангелисте Иоанне Богослове, яко вси по Бозе к тебе прибегаем, ты бо молиши за нас Христа Бога нашего(поклон).
Господи помилуй, Господи помилуй, Господи помилуй(без поклонов). Слава Отцу и Сыну и Святому Духу, и ныне и присно и во веки веком, аминь.
Кондак глас 2. Подобен. В молитвах. Величия твоя девственниче кто исповесть: источаеши бо чюдеса и изливаеши исцелния. И молишися за душа наша яко Богослов и друг Христов.
Икос. Высоты небесныя уведети; и моря глубины испытати, дерзостно есть и непостижимо. Якоже бо звезды исчести, и морския песок невозможно отнюд: сице, и Богословцевая изрещи недоволно есть. Толицеми того венцы Христос, егоже возлюби венча. Емуже и на перси возлег, и на Тайней Вечери с ним яде, яко Богослов и друг Христов.
Песнь 7. Ирмос. Богопротивно веление, беззаконнующа мучителя, высок пламень вознесло есть. Христос же простре Богочестивым детем, хлад духовный, сый благословен и препрославлен.
Запев. Святыи славныи и всехвальныи апостоле и евангелисте Иоанне Богослове моли Бога о нас.
Божественным сияя светолитием, Духа Святаго ясно Богословил еси, исходяща из Безначальнаго Отца, и почивающа на Сыне нераздельно, яко Единосущна.
Запев. Святыи славныи и всехвальныи апостоле и евангелисте Иоанне Богослове моли Бога о нас.
В тебе блаженне положи, праведное Солнце селение. Небо приснодвижимо, иже тебе соделавый. И Богословным ти языком проповедаемый Христос, возлюбленне и препрославленный.
Слава Отцу и Сыну и Святому Духу.
Глагол сила Божественная вещании твоих изыде, преблаженне досточюдне. И премирное ти Евангелие всю обтече землю, учением величествия.
И ныне и присно и вовеки веком, аминь. (Богородичен)
Пречистое зачатие, нетленно Рожество ты едина показала еси, Пречиста пребывши. Бога бо зачала еси над всеми Сущаго Чистая, Человека бывша верным на спасение и избавление.
Катавасия. Избави от бед рабы своя, святыи славныи апостоле и евангелисте Иоанне Богослове, яко вси по Бозе к тебе прибегаем, ты бо молиши за нас Христа Бога нашего. (поклон). Господи помилуй(поклон), Господи помилуй(поклон), Господи помилуй(поклон).
Песнь 8. Ирмос. Пещь огнена иногда в Вавилоне, детели разделяше, Божиим велением, халдеи опаляющи, верныя прохлаждающи поющя благословите вся дела Господня Господа.
Запев. Святыи славныи и всехвальныи апостоле и евангелисте Иоанне Богослове моли Бога о нас.
Якоже молния светлая мимоходящи, вселенней блаженнее явился еси. Чистоты светлостию, девства же блистанием, и благочестия учении, мир просвещая возлюбленне Христу Богу.
Запев. Святыи славныи и всехвальныи апостоле и евангелисте Иоанне Богослове моли Бога о нас.
Телом и душею и умом очищенном, благовестил еси Небесное Христово Евангелие. И ангелом единожитель на небесех бысть, зовый ныне благословите вся дела Господня Господа.
Слава Отцу и Сыну и Святому Духу.
Столп светел, возложение же Божественно, Небесному храму был еси. И престол чювствия, и Премудрости приятелище, Богословия орган, поя, благословите вся дела Господня Господа.
И ныне и присно и вовеки веком, аминь (Богородичен).
Да клятву первую потребиши, и смертное осуждение древле прабабы, от Девы Богоматере Слове Божии родися, всем дарую безсмертие негиблемо.
Катавасия. Избави от бед рабы своя, святыи славныи апостоле и евангелисте Иоанне Богослове, яко вси по Бозе к тебе прибегаем, ты бо молиши за нас Христа Бога нашего. (поклон). Господи помилуй(поклон), Господи помилуй(поклон), Господи помилуй(поклон).
Песнь 9. Ирмос. Безначальна Родителя Сын Бог и Господь, воплощься от Девицы нам явися, омраченная просветити, и собрати расточенная. Тем всехвальную Богородицу величаем.
Запев. Святыи славныи и всехвальныи апостоле и евангелисте Иоанне Богослове моли Бога о нас (поклон).
Ныне не в гаданиих, но лицем к лицу, пищный поток зрети сподобися. И реку смирения, и источник безсмертия. Им же ныне напаяемь, наслаждаещися обожения.
Запев. Святыи славныи и всехвальныи апостоле и евангелисте Иоанне Богослове моли Бога о нас.
На земли просил еси седалище прияти от Христа. Но Он тебе перси Своя дарует, на няже возлег Богослове, твердым и пребывающим седением добрым обогатился еси апостолом украшение.
Слава Отцу и Сыну и Святому Духу.
Мудрость погасил еси, еллинскую безбожную, искони бе Слово, мудре провеща, и к Богу бе Слово, и истинен Бог бяше Слово, им же вся быша, видимая и невидимая.
И ныне и присно и вовеки веком, аминь (Богородичен).
Яко утро обретеся заутренне, в нощи житейстей, девства зарею блистающи. Восток Солнца мысленнаго правде, нам явися Богомати Пречистая.
Катавасия. Избави от бед рабы своя, святыи славныи апостоле и евангелисте Иоанне Богослове, яко вси по Бозе к тебе прибегаем, ты бо молиши за нас Христа Бога нашего. (поклон). Господи помилуй(поклон), Господи помилуй(поклон), Господи помилуй(поклон).
Задостойник, глас 8. Владычице, приими молитву раб Своих и избави нас от всякия нужды и печали. Ты еси Богородице, Оружие наше и Стена, Ты еси Заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси Пренепорочную Матерь Христа Бога нашего, Юже осени Дух Пресвятыи (поклон до земли).
Святыи Боже, Святыи Крепкии, Святыи Безсмертныи, помилуй нас (трижды, с поклонами).
Слава Отцу и Сыну и Святому Духу, и ныне и присно и во веки веком, аминь.
Пресвятая Троице, помилуй нас. Господи, очисти грехи наша. Владыко, прости беззакония наша. Святыи, посети и исцели немощи наша, имене Твоего ради. Господи помилуй (трижды). Слава Отцу и Сыну и Святому Духу, и ныне, и присно, и во веки веком, аминь.
Отче наш, Иже еси на небесех, да святится имя Твое, да приидет царствие Твое, да будет воля Твоя, яко на небеси и на земли. Хлеб наш насущныи даждь нам днесь, и остави нам долги наша, яко же и мы оставляем должником нашим, и не введи нас во искушение, но избави нас от лукаваго.
Господи Исусе Христе, Сыне Божии, помилуй нас. Аминь.
Тропарь, глас 2. Апостоле Христу Богу возлюбленне, потщися избавити люди безответны. Приемлет бо тя припадающа, иже приемлет тя на перси возлегша. Его же моли Богослове, на лежащее прещение языческое яко облак разгнати, прося нам мира и велия милости.
Слава Отцу и Сыну и Святому Духу. Кондак глас 2. Подобен. В молитвах. Величия твоя девственниче кто исповесть: источаеши бо чюдеса и изливаеши исцелния. И молишися за душа наша яко Богослов и друг Христов.
И ныне и присно и во веки веком, аминь. (Богородичен) Вся паче смысла вся преславная Твоя Богородице, таинства, чистотою запечатлена, и девством хранима; Мати разумеся неложна, Бога рождьши Истиннаго Того моли спастися душам нашим.
Посем: Господи помилуй (40 раз, с тремя поклонами в начале). Слава Отцу и Сыну, и Святому Духу, и ныне, и присно, и во веки веком, аминь.
Честнейшую херувим и славнейшую воистину серафим, без истления Бога Слова рождьшую, сущую Богородицу Тя величаем (поклон).
Слава Отцу и Сыну и Святому Духу (поклон)
И ныне и присно и во веки веком, аминь (поклон).
Господи помилуй, Господи помилуй, Господи благослови (поклон).
Отпуст. Господи Исусе Христе, Сыне Божии, молитвами Пречистыя Ти Матери и святаго славнаго и всехвального апостола и евангелиста Иоанна Богослова и всех святых помилуй и спаси нас яко человеколюбец. Аминь.
Господи помилуй (трижды без поклонов).
Затем молишься исходный начал (смотри начало публикации).