Встав перед образом, мирянин молится малый начал.
Боже, милостив буди мне грешному (поклон).
Создавыи мя, Господи, и помилуй мя (поклон).
Без числа согреших, Господи, помилуй и прости мя, грешнаго (поклон).
Достойно есть, яко воистину блажити Тя Богородице, присно блаженную и пренепорочную, и Матерь Бога нашего. Честнейшую херувим и славнейшую воистину серафим, без истления Бога Слова рождьшую, сущую Богородицу, Тя величаем.(поклон всегда земной).
Слава Отцу и Сыну и Святому Духу (поклон).
И ныне и присно и во веки веком, аминь (поклон).
Господи помилуй, Господи помилуй, Господи благослови (поклон).
Господи, Исусе Христе, Сыне Божии, молитв ради Пречистыя Твоея Матере, силою Честнаго и Животворящаго Креста, и святаго Ангела моего хранителя, и всех ради святых, помилуй и спаси мя грешнаго, яко Благ и Человеколюбец. Аминь (поклон земной, без крестнаго знамения).
Эти молитвы называются «началом» или «приходными и исходными поклонами» потому, что они совершаются в начале и после всякого молитвенного правила. После этого повтори молитву мытаря с поклонами:
Боже, милостив буди мне грешному (поклон).
Создавыи мя, Господи, и помилуй мя (поклон).
Без числа согреших, Господи, помилуй и прости мя грешнаго (поклон).
3а молитв святых отец наших, Господи Исусе Христе Сыне Божии, помилуй нас.
Аминь. Святыи Боже, Святыи Крепкии, Святыи Безсмертныи, помилуй нас (трижды, с поклонами).
Слава Отцу и Сыну и Святому Духу, и ныне и присно и во веки веком, аминь.
Пресвятая Троице, помилуй нас. Господи, очисти грехи наша. Владыко, прости беззакония наша. Святыи, посети и исцели немощи наша, имене Твоего ради.
Господи помилуй (трижды). Слава Отцу и Сыну и Святому Духу, и ныне, и присно, и во веки веком, аминь.
Отче наш, Иже еси на небесех, да святится имя Твое, да приидет царствие Твое, да будет воля Твоя, яко на небеси и на земли. Хлеб наш насущныи даждь нам днесь, и остави нам долги наша, яко же и мы оставляем должником нашим, и не введи нас во искушение, но избави нас от лукаваго.
Господи Исусе Христе, Сыне Божии, помилуй нас.
Аминь. Господи помилуй (12 раз).
Слава Отцу и Сыну, и Святому Духу, и ныне, и присно, и во веки веком, аминь.
Приидите, поклонимся Цареви нашему Богу (поклон).
Приидите, поклонимся Христу Цареви и Богу нашему (поклон).
Приидите, поклонимся и припадем к самому Господу Исусу Христу, Цареви и Богу нашему (поклон).
Псалом 142.Господи, услыши молитву мою, внуши моление мое во истине Твоей, услыши мя в правде Твоей. И не вниди в суд с рабом Твоим, яко не оправдится пред Тобою всяк живыи. Яко погна враг душу мою, и смирил есть в земли живот мой. Посадил мя есть в темных, яко мертвыя веку, и уны во мне дух мой, во мне смутися сердце мое. Помянух дни древния, поучихся во всех делех Твоих, и в делех руку Твоею поучахся. Воздех к Тебе руце мои, душа моя, яко земля безводная Тебе. Скоро услыши мя Господи, исчезе дух мой. Не отврати лица Твоего от мене, и уподоблюся низходящим в ров. Слышану сотвори мне заутра милость Твою, яко на Тя уповах. Скажи мне Господи, путь вонь же пойду, яко к Тебе взях душу мою. Изми мя от враг моих Господи, к Тебе прибегох. Научи мя творити волю Твою, яко Ты еси Бог мой. Дух Твой благии наставит мя на землю праву. Имене Твоего ради, Господи живиши мя, правдою Твоею изведеши от печали душу мою. И милостию Твоею потребиши враги моя, и погубиши вся стужающия души моей, яко аз раб Твой есмь.
Слава Отцу и Сыну, и Святому Духу, и ныне, и присно, и во веки веком, аминь.
Аллилуия, Аллилуия, слава Тебе, Боже (трижды, с поклонами).
Господи помилуй (12 раз).
Слава Отцу и Сыну, и Святому Духу, и ныне, и присно, и во веки веком, аминь.
Бог Господь и явися нам, благословен грядыи во имя Господне.
Бог Господь и явися нам, благословен грядыи во имя Господне.
Стих 1. Исповедайтеся Господеви яко Благ, яко в век милость Его.
Бог Господь и явися нам, благословен грядыи во имя Господне.
Стих 2. Обышедше обыдоша мя и именем Господним противляхся им.
Бог Господь и явися нам, благословен грядыи во имя Господне.
Стих 3. Не умру, но жив буду и повем дела Господня.
Бог Господь и явися нам, благословен грядыи во имя Господне.
Стих 4: Камень, Его же небрегоша зиждущии, Сей бысть во главу углу, от Господа бысть Сей, и есть дивна во очию нашею.
Бог Господь и явися нам, благословен грядыи во имя Господне.
Тропарь, глас 1-й. Спаси Господи люди Своя, и благослови достояние Свое, победы державе нашей на сопротивныя даруй, и Своя сохраняя Крестом люди.
Спаси Господи люди Своя, и
благослови достояние Свое, победы державе нашей на сопротивныя даруй, и Своя
сохраняя Крестом люди.
Слава Отцу и Сыну, и Святому Духу, и ныне, и присно, и во веки
веком, аминь.
Спаси Господи люди Своя, и благослови достояние Свое, победы державе нашей на сопротивныя даруй, и Своя сохраняя Крестом люди.
Псалом 50.Помилуй мя Боже, по велицей милости Твоей. И по множеству щедрот Твоих, очисти беззаконие мое. Наипаче омый мя от беззакония моего и от греха моего очисти мя. Яко беззаконие мое аз знаю, и грех мой предо мною есть выну. Тебе единому согреших, и лукавое пред Тобою сотворих. Яко да оправдишися в словесех Своих и победиши внегда судити. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очишуся, омыеши мя, и паче снега убелюся. Слуху моему даси радость и веселие, возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне Боже, и дух прав обнови во утробе моей. Не отверзи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычным утверди мя. Научу беззаконныя путем Твоим, и нечестивии к Тебе обратятся. Избави мя от кровий Боже, Боже спасения моего, возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел жертвы, дал бых убо, всесожжения не благоволиши. Жертва Богу, дух сокрушен, сердце сокрушено и смирено, Бог не уничижит. Ублажи, Господи, благоволением Твоим Сиона, и да созиждутся стены иеросалимския. Тогда благоволиши жертву правды, возношение и всесожигаемая. Тогда возложат на олтарь Твой тельца.
Господи Исусе Христе Сыне Божии, помилуй нас. Аминь.
Канон, глас 8-й Песнь 1. Ирмос
Креста начертав Моисей, впрям жезлом Чермное пресече, Израилю проходящу. Тоя же обращь на фараона с колесницами ударив совокупи, впреки написав непобедимо оружие. Тем Христа воспоем Бога нашего, яко прославися.
Запев: Слава Господи Кресту Твоему Честному (поклон).
Образ древле Моисей Пречистыя страсти на себе прообрази, священных среде стоя. Крест же воображь си, простертыма победу дланьма воздвиже, державу погубив, Амалика всегубителя. Тем Христа воспоем Бога нашего, яко прославися.
Слава Господи Кресту Твоему Честному.
Образ древле Моисей Пречистыя страсти на себе прообрази, священных среде стоя. Крест же воображь си, простертыма победу дланьма воздвиже, державу погубив, Амалика всегубителя. Тем Христа воспоем Бога нашего, яко прославися.
Слава Отцу и Сыну и Святому Духу.
Воздвиже Моисей, на столпе исцеление, тлетворения избавление, и ядовитаго угрызения. И древо образно Креста, к земли пресмыкаема змия привязав впреки, лукавныи о сем обличи вред. Тем Христа воспоем Бога нашего, яко прославися.
И ныне и присно и во веки веком, аминь.
Показа небо крестную победу, благочестия держателю царю богомудру: врагом в том враждебным низложися шатание, лесть превратися, и вера простреся земленым концем божественая. Тем Христа воспоем Бога нашего, яко прославися.
Катавасия: Сохрани от бед рабы Своя силою Честнаго Креста Твоего Милостиве, яко усердно к Тебе прибегаем, к милостивому Избавителю и всех Владыце Господу Исусу. (Поклон).
Господи помилуй (3 раза с поклонами).
Песнь 3. Ирмос
Жезл во образ тайны приемлется, прозябением бо разсуди иерея: неплодящей же прежде церкви, ныне процвете древо Креста, в державу и утверждение.
Слава Господи Кресту Твоему Честному.
Яко испусти ударяемь, воду краесекомыи, непокоривым людем и жестосердым, богозванней Церкви проявляше таинство, ей же Крест держава и утверждение.
Слава Господи Кресту Твоему Честному.
Яко испусти ударяемь, воду краесекомыи, непокоривым людем и жестосердым, богозванней Церкви проявляше таинство, ей же Крест держава и утверждение.
Слава Отцу и Сыну и Святому Духу.
Ребром пречистым, копием прободенным, вода с кровию истече, обновляющи завет, и омывательное грехов. Верным бо Крест похвала, и царем держава и утверждение.
И ныне и присно и во веки веком, аминь.
Ребром пречистым, копием прободенным, вода с кровию истече, обновляющи завет, и омывательное грехов. Верным бо Крест похвала, и царем держава и утверждение.
Катавасия. Сохрани от бед рабы Своя силою Честнаго Креста Твоего Милостиве, яко усердно к Тебе прибегаем, к милостивому Избавителю и всех Владыце Господу Исусу. (Поклон).
Господи помилуй (3 раза с поклонами).
Слава Отцу и Сыну и Святому Духу, и ныне и присно и во веки веком, аминь.
Седален, глас 4-й. О тебе треблаженне и жизнодавче Кресте, людие питаемии спразднуют. С безплотными лики, чин архиерейскии благоговейно поют. Множество же иночествующих, и постник покланяются. Христа же распеншагося вси прославляем.
Песнь 4. Ирмос
Услышах Господи смотрения Твоего таинство, разумех дела Твоя, и прославих Твое Божество.
Слава Господи Кресту Твоему Честному.
Горькочадныя преложь древом Моисей, в пустыни древле воды, Крестом к благочестию язык, проявляя преложение.
Слава Господи Кресту Твоему Честному.
В глубине погрязшу секущую издаст, Иордан древо. Крестом и крещением, пресечение льсти назнаменуя.
Слава Отцу и Сыну и Святому Духу.
Священно воополчаются четверочастнии людие предходяще образы, свидетельствова скинии, крестообразными чинми проявляемь.
И ныне и присно и во веки веком, аминь. Дивно простираемь, солнечныя лучи испущает Крест, и исповедаша небеса славу Бога нашего.
Катавасия. Сохрани от бед рабы Своя силою Честнаго Креста Твоего Милостиве, яко усердно к Тебе прибегаем, к милостивому Избавителю и всех Владыце Господу Исусу. (Поклон).
Господи помилуй (3 раза с поклонами).
Песнь 5. Ирмос
О, треблаженное древо, на нем же распятся Христос Царь и Господь. Им же падеся иже древом прельщеи, тобою прельщен бысть, Христови пригвождьшуся плотию, подающему мир душам нашим.
Слава Господи Кресту Твоему Честному.
Тебе присносущее древо, на нем же распятся Христос, Едема хранящее, обращаемо оружие устыдеся. Страшныи же Херувим уступает распятому Христу, подающему мир душам нашим.
Слава Господи Кресту Твоему Честному.
Тебе присносущее древо, на нем же распятся Христос, Едема хранящее, обращаемо оружие устыдеся. Страшныи же Херувим уступает распятому Христу, подающему мир душам нашим.
Слава Отцу и Сыну и Святому Духу.
Преисподния силы противныя Креста устрашаются, начертаема знамения на воздусе. По нему же ходят небесных и земных роди, колена прекланяюще Христу, подающему мир душам нашим.
И ныне и присно и во веки веком, аминь.
Зарями нетлеющими явлься божественыи Крест. Омраченным языком, заблуждением прелести, божественыи свет облистав, присвояет на нем распятому Христу, подающему мир душам нашим.
Катавасия. Сохрани от бед рабы Своя силою Честнаго Креста Твоего Милостиве, яко усердно к Тебе прибегаем, к милостивому Избавителю и всех Владыце Господу Исусу. (Поклон).
Господи помилуй (3 раза с поклонами).
Песнь 6. Ирмос
Водна зверя во утробе длани Иона крестообразно распростер, спасеную страсть проображаше ясне. Тем и тридневно изшед, всемирное воскресение прописаше, плотию пригвождена Христа Бога. И тридневным воскресением, мира просвещьшаго.
Слава Господи Кресту Твоему Честному.
Старостию преклонься, и недугом отягчен исправися, Иаков руце преложь, действие являше жизнодавца Креста. Обетшанием бо законнаго стеннаго писания, понови писав на нем пригвоздивыися плотию Бог, и душетленныи недуг льсти отгнал есть.
Слава Господи Кресту Твоему Честному.
Старостию преклонься, и недугом отягчен исправися, Иаков руце преложь, действие являше жизнодавца Креста. Обетшанием бо законнаго стеннаго писания, понови писав на нем пригвоздивыися плотию Бог, и душетленныи недуг льсти отгнал есть.
Слава Отцу и Сыну и Святому Духу.
На юныя возложь длани божественыи Израиль, крестообразно главы являше, яко старейшии Слова, законослужебнии людие, мнев же тем спрельститися. Неизменныи живоносныи Образ. Превзыдут бо людие Христа Бога. Новоутвержении пояху, Крестом ограждаеми.
И , и ныне и присно и во веки веком, аминь.
На юныя возложь длани божественыи Израиль, крестообразно главы являше, яко старейшии Слова, законослужебнии людие, мнев же тем спрельститися. Неизменныи живоносныи Образ. Превзыдут бо людие Христа Бога. Новоутвержении пояху, Крестом ограждаеми.
Катавасия. Сохрани от бед рабы Своя силою Честнаго Креста Твоего Милостиве, яко усердно к Тебе прибегаем, к милостивому Избавителю и всех Владыце Господу Исусу. (Поклон).
Господи помилуй (3 раза с поклонами).
Слава Отцу и Сыну и Святому Духу, и ныне и присно и во веки веком, аминь.
Кондак, глас 4-й. Вознесыися на Крест волею, тезоименитому Ти ныне жительству, щедроты Твоя даруй Христе Боже. Возвесели силою Своею державу нашу, победы дая ей на сопостаты, пособие имущу Твое оружие миру, непобедимую победу.
Икос. Иже до третияго небесе восхищен бысть в Рай, и беседы услышав божественыя и неизреченныя, их же не подобает языки человеческими глаголати. Что галатом пишет яко рачителем писанию, прочтосте и разуместе. Мне рече не буди хвалитися, токмо о Кресте Господни, на нем же страдав уби страсти. Того убо и мы известно держимся, Креста Господня похвалы всех. Есть бо нам спасение сие древо, оружие миру, непобедимая победа.
Песнь 7. Ирмос
Безумна заповедь мучителя злочестива, людьми поколеба, дышуща прещением и злохулением богомерзским. Обаче триех отрок не искуси ярость зверьская, ни огнь снедаяи. Но дышущу хладному духу, со огнем суще пояху, препетыи отец наших Боже благословен еси.
Слава Господи Кресту Твоему Честному.
От древа вкушь первыи в человецех, в тление вселися: отпадением бо живота, безчестием осудився, всему роду телотленен некии, яко вред недуга подал есть. Но обретше землении возвание, крестное древо, зовем: препетыи отец наших Боже благословен еси.
Слава Господи Кресту Твоему Честному.
От древа вкушь первыи в человецех, в тление вселися: отпадением бо живота, безчестием осудився, всему роду телотленен некии, яко вред недуга подал есть. Но обретше землении возвание, крестное древо, зовем: препетыи отец наших Боже благословен еси.
Слава Отцу и Сыну и Святому Духу.
Разруши повеление Божие ослушание, и древо изнесе смерть земленым. Еже не в благо время причастно. Во утверждение зело честному, отселе животное древо возбраняет, еже разбойнику люте умершу отверзе, благоразумно вопиющу, препетыи отец наших Боже благословен еси.
И ныне и присно и во веки веком, аминь.
Жезла ся касает краеви Иосиф, бывающих зря Израиль, царьствию державное. Яко преспеет преславныи Крест проявляя. Сея бо царем победная похвала, и свет верою зовущим, препетыи отец наших Боже благословен еси.
Катавасия. Сохрани от бед рабы Своя силою Честнаго Креста Твоего Милостиве, яко усердно к Тебе прибегаем, к милостивому Избавителю и всех Владыце Господу Исусу. (Поклон).
Господи помилуй (3 раза с поклонами).
Песнь 8. Ирмос
Благословите дети, Троицы равночислении, Содетеля Отца Бога. Пойте сошедшаго Слова, и огнь в росу претворшаго. И превозносите всем живот дающаго, Духа Пресвятаго во веки вся.
Слава Господи Кресту Твоему Честному.
Воздвизаемо древо окроплено кровию, воплощьшагося Слова Бога, пойте небесныя силы, и земленым воздвижение празднующе людие, поклонитеся Кресту Христову, им же миру воскресение во веки вся.
Слава Господи Кресту Твоему Честному.
Воздвизаемо древо окроплено кровию, воплощьшагося Слова Бога, пойте небесныя силы, и земленым воздвижение празднующе людие, поклонитеся Кресту Христову, им же миру воскресение во веки вся.
Слава Отцу и Сыну и Святому Духу.
Земленыя длани смотритель благодати Креста, на нем же стоя Христос Бог. Возносите священнолепно копие, Божия слова тело прободшее. Да видят языцы вси спасение Божие, славяще Его во веки вся.
И ныне и присно и во веки веком, аминь. Божественым судом избраннии веселитеся, християнстии вернии царие хвалитеся, победоносное оружие приемше от Бога, Крест честныи. О сем бо колена брани и дерзости имуще, разсыпаются во веки вся.
Катавасия. Сохрани от бед рабы Своя силою Честнаго Креста Твоего Милостиве, яко усердно к Тебе прибегаем, к милостивому Избавителю и всех Владыце Господу Исусу. (Поклон).
Господи помилуй (3 раза с поклонами).
Песнь 9. Ирмос
Таин еси Богородице Рай, не возделанно возрастивши Христа, им же крестное и живоносное на земли насаждено бысть древо. Тем ныне возносиму, покланяющеся ему Тя величаем. (Поклон).
Запев с поклоном: Слава Господи Кресту Твоему Честному.
Да возрадуются древа дубравная вся, освящьшуся естеству их. От него же исперва быша насаждена, Христу распростершуся на древе. Тем ныне возносиму поклоняющеся ему Тя величаем. (Поклон).
Слава Господи Кресту Твоему Честному.
Да возрадуются древа дубравная вся, освящьшуся естеству их. От него же исперва быша насаждена, Христу распростершуся на древе. Тем ныне возносиму поклоняющеся ему Тя величаем. (Поклон).
Слава Отцу и Сыну и Святому Духу.
Священныи воста рог, и глава всем богомудрым Крест, им же грешных мыслено стираются рози вси. Тем ныне возносиму, поклоняющеся ему, Тя величаем. (Поклон).
И ныне и присно и во веки веком, аминь.
Священныи воста рог, и глава всем богомудрым Крест, им же грешных мыслено стираются рози вси. Тем ныне возносиму, поклоняющеся ему, Тя величаем. (Поклон).
Катавасия. Сохрани от бед рабы Своя силою Честнаго Креста Твоего Милостиве, яко усердно к Тебе прибегаем, к милостивому Избавителю и всех Владыце Господу Исусу. (Поклон).
Господи помилуй (3 раза с поклонами).
Задостойник: Таин еси Богородице Рай, не возделанно возрастивши Христа, им же крестное и живоносное на земли насаждено бысть древо. Тем ныне возносиму, покланяющеся ему Тя величаем. (Земной поклон).
Святыи Боже, Святыи Крепкии, Святыи Безсмертныи, помилуй нас (трижды, с поклонами).
Слава Отцу и Сыну и Святому Духу, и ныне и присно и во веки веком, аминь.
Пресвятая Троице, помилуй нас. Господи, очисти грехи наша. Владыко, прости беззакония наша. Святыи, посети и исцели немощи наша, имене Твоего ради.
Господи помилуй (трижды). Слава Отцу и Сыну и Святому Духу, и ныне, и присно, и во веки веком, аминь.
Отче наш, Иже еси на небесех, да святится имя Твое, да приидет царствие Твое, да будет воля Твоя, яко на небеси и на земли. Хлеб наш насущныи даждь нам днесь, и остави нам долги наша, яко же и мы оставляем должником нашим, и не введи нас во искушение, но избави нас от лукаваго.
Господи Исусе Христе Сыне Божии, помилуй нас. Аминь.
Спаси Господи люди Своя, и
благослови достояние Свое, победы державе нашей на сопротивныя даруй, и Своя
сохраняя Крестом люди.
Слава Отцу и Сыну и Святому Духу, и ныне и присно и во веки веком, аминь.
Кондак, глас 4-й. Вознесыися на Крест волею, тезоименитому Ти ныне жительству, щедроты Твоя даруй Христе Боже. Возвесели силою Своею державу нашу, победы дая ей на сопостаты, пособие имущу Твое оружие миру, непобедимую победу.
Господи помилуй (40 с 3 поклонами).
Слава Отцу и Сыну и Святому Духу, и ныне и присно и во веки веком. Аминь.
Честнейшую херувим и славнейшую воистину серафим, без истления Бога Слова рождьшую, сущую Богородицу, Тя величаем (поклон).
Слава Отцу и Сыну и Святому Духу (поклон).
И ныне и присно и во веки веком, аминь (поклон).
Господи помилуй, Господи помилуй, Господи благослови (поклон).
Отпуст: Господи Исусе Христе Сыне Божии, молитв ради пречистыя Твоея Матере, силою Честнаго и Животворящаго Креста, и всех святых, помилуй, и спаси нас, яко Благ и Человеколюбец. Аминь.
Боже, милостив буди мне грешному (поклон).
Создавыи мя, Господи, и помилуй мя (поклон).
Без числа согреших, Господи, помилуй и прости мя, грешнаго (поклон).
Достойно есть, яко воистину блажити Тя Богородице, присно блаженную и пренепорочную, и Матерь Бога нашего. Честнейшую херувим и славнейшую воистину серафим, без истления Бога Слова рождьшую, сущую Богородицу, Тя величаем (поклон всегда земной).
Слава Отцу и Сыну и Святому Духу (поклон).
И ныне и присно и во веки веком, аминь (поклон).
Господи помилуй, Господи помилуй, Господи благослови (поклон).
Господи, Исусе Христе, Сыне Божии, молитв ради Пречистыя Твоея Матере, силою Честнаго и Животворящаго Креста, и святаго Ангела моего хранителя, и всех ради святых, помилуй и спаси мя грешнаго, яко Благ и Человеколюбец. Аминь (поклон земной, без крестнаго знамения).
Боже, милостив буди мне грешному (поклон).
Создавыи мя, Господи, и помилуй мя (поклон).
Без числа согреших, Господи, помилуй и прости мя грешнаго (поклон).